Þór Þorlákshöfn tryggði sér sigur í 1. deild karla í körfubolta í kvöld með því að leggja Val að velli á heimavelli, 99-79.
Þórsarar eiga fjóra leiki eftir í deildinni en yfirburðir þeirra hafa verið slíkir í vetur að enginn keppinautanna á möguleika á því að ná þeim að stigum.
Þeir grænu voru lengi í gang í kvöld en þeir náðu 11 stiga forskoti um miðjan 2. leikhluta, 37-26. Valsarar svöruðu fyrir sig og minnkuðu muninn í 42-40 en staðan var 50-42 í hálfleik.
Eftir kaflaskiptan fyrri hálfleik náðu Þórsarar góðu skriði í 3. leikhluta þar sem forskotið var 20 stig að honum loknum, 75-55. Þór hélt sínu striki í síðasta fjórðungnum og fagnaðarlætin voru mikil í leikslok þegar ljóst var að Þór Akureyri hafði tapað fyrir Skallagrím á sama tíma. Þar með var sæti Þorlákshafnarliðsins í úrvalsdeildinni tryggt.
Eric Palm var stigahæstur Þórsara með 33 stig, Grétar Ingi Erlendsson skoraði 18 og Vladimir Bulut 17 auk þess að taka 13 fráköst.