Rúta með 22 tékkneska ferðamenn innanborðs hafnaði ofan í Blautulónum á Fjallabaksleið nyrðri á fimmta tímanum í dag. Ferðamennirnir komust allir á þurrt land af sjálfsdáðum og gátu hringt eftir aðstoð.
Björgunarsveitir á svæðinu fóru til aðstoðar ásamt landvörðum, en björgunarsveitir frá Vík, Kirkjubæjarklaustri, Skaftártungu og Álftaveri voru kallaðar út. Flugbjörgunarsveit Hellu var hinsvegar fyrst á staðinn þar sem hún var í hálendisvakt björgunarsveita á svæðinu þegar kallið barst.
Rauði krossinn á Vík opnaði fjöldahjálparstöð og tók á móti fólkinu sem hefur verið útveguð gisting í Vík.
Farangur fólksins og persónulegir munir eru enn um borð í rútunni, sem er á bólakafi í Blautulóni. Verið er að vinna í því að skoða björgun á bílnum, en ekki er ljóst á hvaða dýpi hann er. Kafarar munu leita að honum í vatninu.