Óvenjuleg uppákoma varð á síðasta fundi hreppsnefndar Rangárþings ytra þar sem meirihlutinn í Á-listanum vísaði frá tillögu sem hann sjálfur lagði fram.
Tillagan snerist um staðgengil sveitarstjóra en Gunnsteinn Ómarsson tekur sér vikufrí síðar í mánuðinum. Meirihlutinn lagði til að Guðfinna Þorvaldsdóttir, oddviti, tæki að sér að leysa Gunnstein af í fríinu.
Fulltrúar D-listans lögðu fram breytingartillögu og bentu á að ekki tíðkaðist að skipa staðgengla framkvæmdastjóra sveitarfélaga taki þeir sér frí í fáa daga. Starfsfólk sveitarfélagsins væri fullfært um að taka við erindum og upplýsa fólk á meðan.
Í kjölfar tillögu D-listans lögðu fulltrúar Á-listans til að tillögu Á-listans yrði vísað frá og var það samþykkt samhljóða.