Hlaup hófst í Skaftá um kl. 1 í nótt og er það mun stærra en hlaupið í síðustu viku.
Hlaupið nú er úr austari katlinum, þeim stærri. Samkvæmt upplýsingum frá vatnamælingamönnum Veðurstofu Íslands má búast við hlaupi allt 12-1.400 m3/sek. Nokkuð var fyrir í ánni sökum leysinga og úrkomu.
Ekki er talin hætta á ferðum en Almannavarnir telja rétt að vara við brennisteinsmengun sem helst gætir nærri upptökum hlaupvatnsins. Ferðamenn á svæðinu eru beðnir að fara gætilega.
Mun meira vatn er í þessu hlaupi en því sem kom úr vestari katlinum þann 20. júní sl. Má búast við því að vatn fari yfir vegi við Hólaskjól og Skaftárdal.
Lögreglan á Hvolsvelli fylgist með framvindu á staðnum í samvinnu við Veðurstofuna og almannavarnadeild ríkislögreglustjórans.