Björgunarsveitarmenn úr Hjálparsveitinni Tintron í Grímsnesi hafa sinnt fjölmörgum verkefnum í morgun, meðal annars splundraðist veglegt bjálkahús í sumarbústaðalandi við Miðfell í Þingvallasveit.
Að sögn Jóhannesar Geirs Sigurjónssonar, björgunarsveitarmanns í Tintron, sinnti sveitin fjölda útkalla í morgun víða um svæðið. Þakplötur og þakgluggar fuku af útihúsum á að minnsta kosti sex stöðum. Ekki urðu slys á fólki og björgunarsveitarmenn gerðu það sem þeir gátu til að festa niður það sem eftir stóð.
Einnig var malbikið farið að yfirgefa Biskupstungnabraut á vegkafla við Stóru-Borg.
Bjálkahúsið sem sprakk í veðurofsanum við Miðfell dreifði sér yfir stór svæði og inn á næstu lóðir en björgunarsveitarmennirnir náðu að fergja þakið og stærstu hluta hússins svo að þeir myndu ekki fjúka lengra.
Brakið dreifðist um stórt svæði. sunnlenska.is/Björn Kristinn Pálmarsson