Það var snælduvitlaust veður við Óseyrarbrú yfir Ölfusárósa á tímabili í morgun og tilkynnti Vegagerðin að Eyrarbakkavegur við Óseyri væri ófær vegna sandfoks.
Þegar sunnlenska.is skoðaði aðstæður við Óseyrarbrú í hádeginu var veðrið að mestu gengið niður en þó var sandblástur og grjótfok, sérstaklega vestan brúarinnar.
Við vesturendann voru sandskaflar á veginum og austan megin var klæðning byrjuð að losna af veginum við brúarsporðinn.
Nú er greiðfært um allt Suðurland en hvassviðri. Reyndar eru hálkublettir á Hellisheiði. Hálkublettir eru sumstaðar á útvegum og í uppsveitum. Hálka er á efrihluta Landvegar.
Greiðfært er með Suðausturströndinni og hvassviðri.
Klæðningin var farin að flettast af veginum við austurenda Óseyrarbrúar. sunnlenska.is/Guðmundur Karl